دسواں حصّہ ۔  (آیت الکرسی)

آٹھواں جملہ ہے "وَسِعَ كُرۡسِيُّهُ ٱلسَّمَـٰوَٲتِ وَٱلۡأَرۡضَ‌ۖ" یعنی "اس کی کرسی اتنی بڑی ہے جس کی وسعت کے اندر ساتوں آسمان اور زمین سمائے ہوئے ہیں"۔ 

الّٰلہ جلّ شانہ نشست و برخاست اور قیام و مکان سے بالاتر ہیں۔ اس قسم کی آیات کو اپنے معاملات پہ قیاس نہ کیا جائے۔ اس کی کیفیت و حقیقت کا ادراک انسانی عقل سے بالاتر ہے۔ البتّہ مستند روایاتِ حدیث سے اتنا معلوم ہوتا ہے کہ عرش اور کرسی بہت عظیم الشان جسم ہیں جو تمام آسمان اور زمین سے بدرجہا بڑے ہیں۔

ابنِ کثیر ؒ نے بروایتِ حضرت ابو ذر غفّاری رضی الّٰلہ عنہ نقل کیا ہے کہ انہوں نے آنحضرت ﷺ سے دریافت کیا کہ کرسی کیا اور کیسی ہے؟ آپ ﷺ نے فرمایا، "قسم ہے اس ذات کی جس کے قبضے میں میری جان ہے کہ ساتوں آسمانوں اور زمینوں کی مثال کرسی کے مقابلے میں ایسی ہے کہ جیسے ایک بڑے میدان میں کوئ حلقہ انگشتری جیسا ڈال دیا جائے۔

ماخوذ از معارف القرآن، از مفتی محمد شفیع ؒ