Tuesday, 9 May 2017

سورہٴ البقرہ: ٢٦٧

يَـٰٓأَيُّهَا ٱلَّذِينَ ءَامَنُوٓاْ أَنفِقُواْ مِن طَيِّبَـٰتِ مَا ڪَسَبۡتُمۡ وَمِمَّآ أَخۡرَجۡنَا لَكُم مِّنَ ٱلۡأَرۡضِ‌ۖ وَلَا تَيَمَّمُواْ ٱلۡخَبِيثَ مِنۡهُ تُنفِقُونَ وَلَسۡتُم بِـَٔاخِذِيهِ إِلَّآ أَن تُغۡمِضُواْ فِيهِ‌ۚ وَٱعۡلَمُوٓاْ أَنَّ ٱللَّهَ غَنِىٌّ حَمِيدٌ۔

"اے ایمان والو! جو کچھ تم نے کمایا ہو اور جو پیداوار ہم نے تمہارے لئے زمین سے نکالی ہو اس کی اچھی چیزوں کا ایک حصّہ (الّٰلہ کے راستے میں ) خرچ کیا کرو؛ اور یہ نیّت نہ رکھو کہ بس ایسی خراب قسم کی چیزیں (الّٰلہ) کے نام پر دیا کرو گے جو (اگر کوئ دوسرا تمہیں دے تو نفرت کے مارے) تم اسے آنکھیں میچے بغیر نہ لے سکو۔ اور یاد رکھو کہ الّٰلہ ایسا بے نیاز ہے کہ ہر قسم کی تعریف اسی کی طرف لوٹتی ہے۔"

اس آیت کا شانِ نزول یہ ہے کہ بعض لوگ صدقے کے لئے خراب چیزیں لے آتے تھے، اس پر یہ آیت نازل ہوئ اور اس کی رو سے طیّب کے معنی عمدہ کے لیے گئے ہیں۔ بعض مفسّرین حضرات نے "طیّب" کی تفسیر حلال سے کی ہے کیونکہ کوئ بھی چیز پوری عمدہ اسی وقت ہوتی ہے جب وہ حلال بھی ہو۔ 

یہ تاکید اس شخص کے لیے ہے جس کے پاس عمدہ چیز بھی ہو اور وہ پھر بھی جان بوجھ کر الّٰلہ کی راہ میں نکمّی اور خراب چیز  صدقہ کرے۔ لیکن اگر ایسا کوئ غریب آدمی ہو جس کے پاس اچھی اور عمدہ چیز ہو ہی نہیں وہ اس ممانعت سے بری ہے، اور اس کی وہ ناقص چیز بھی الّٰلہ تعالیٰ کے ہاں مقبول ہے۔ 

ماخوذ از معارف القرآن، از مفتی محم شفیع رحمتہ الّٰلہ علیہ

Monday, 8 May 2017

سورہٴ البقرہ: ٢٦١ تا ٢٦٤ ۔ آٹھواں اور آخری حصّہ

اس پورے رکوع کا خلاصہ یہ ہوا کہ الّٰلہ کی راہ میں جو مال خرچ کیا جائے اس کے الّٰلہ تعالیٰ کے نزدیک مقبول ہونے کی چھ شرائط ہیں:  

اوّل اس مال کا حلال ہونا جو الّٰلہ کی راہ میں خرچ کیا جائے، دوسرے رسول الّٰلہ ﷺ کی سنّت کے مطابق خرچ کرنا، تیسرے صحیح مصرف میں خرچ کرنا، چوتھے صدقہ و خیرات دے کے احسان نہ جتلانا، پانچویں ایسا کوئ رویّہ اختیار نہ کرنا جس سے ان لوگوں کی تحقیر ہو جن کو یہ مال دیا گیا ہے، چھٹے جو کچھ مال خرچ کیا جائے اخلاصِ نیّت کے ساتھ خالصتاً الّلہ تعالیٰ کی رضا جوئ کے لئے خرچ کیا جائے، اس میں نام و نمود اور شہرت حاصل کرنے کی نیّت نہ ہو۔

دوسری شرط یعنی رسول الّٰلہ ﷺ کی سنٰت کے مطابق خرچ کرنے کا مطلب یہ ہے کہ خرچ کرتے وقت اس کا لحاظ رہے کہ کسی حقدار کی حق تلفی نہ ہو۔ اپنے اہل و عیال کو تنگی میں ڈال کر، اور ان کی رضا مندی کے بغیر ان کے اخراجات کم یا بند کر کے، صدقہ و خیرات کرنا کوئ نیکی کا کام نہیں۔ اسی طرح حاجتمند وارثوں کو محروم کرکے سارے مال کو صدقہ و خیرات یا وقف کر دینا بھی رسول الّٰلہ ﷺ کی تعلیم کے خلاف ہے۔ پھر کسی بھی وقت الّٰلہ کی راہ میں خرچ کرنے کی ہزاروں صورتیں ہیں۔ سنّت کا طریقہ یہ ہے کہ انسان یہ دیکھے کہ اس وقت کہاں خرچ کرنے کی اہمیت اور ضرورت کی شدّت زیادہ ہے، پھر وہاں خرچ کرے۔ اسلام اعتدال کا مذہب ہے۔ کسی ایک جذبے کی شدّت سے مغلوب ہو کر اپنا سارا یا زیادہ مال وہاں خرچ کرنا، اور مالی فرائض و واجبات مثلاً گھر والوں یا رشتہ داروں کے حقوق کا خیال نہ رکھنا، یہ شریعت و سنّت کا طریقہ نہیں۔

ماخوذ از معارف القرآن، از مفتی محمد شفیع رحمتہ الّٰلہ علیہ

Sunday, 7 May 2017

سورہٴ البقرہ: ٢٦١ تا ٢٦٤ ۔ ساتواں حصّہ

اس آیت میں صدقہ کے قبول ہونے کی ایک اور شرط کا بیان فرمایا گیا ہے کہ جو شخص لوگوں کے دکھاوے اور لوگوں میں اپنی شہرت اور تعریف ہو جانے کی غرض سے صدقہ خیرات کرتا ہے، ایسے شخص کو آخرت میں اپنے اس صدقے کا کچھ ثواب اور بدلہ نہیں ملے گا۔ ہر شخص کو اپنے اعمال کا وہی بدلہ ملتا ہے جس کی وہ نیّت کرتا ہے۔ جو شخص الّٰلہ تعالیٰ کو راضی کرنے کی نیّت سے مال خرچ کرتا ہے، اسے الّٰلہ تعالیٰ کی رضا ملتی ہے، اور جو شخص لوگوں کی تعریف حاصل کرنے کی نیّت سے مال خرچ کرتا ہے، اسے لوگوں کی تعریف تو شاید مل جائے لیکن الّٰلہ کی رضا نہیں ملتی۔

اس آیت سے قبولیتِ صدقہ و خیرات کی یہ شرط معلوم ہوئ کہ جو کچھ بھی خرچ کرے خالصتاً الّٰلہ تعالیٰٰ کی رضا جوئ اور ثوابِ آخرت کی نیّت سے خرچ کرے، اس میں دکھلاوے اور شہرت حاصل کرنے کی نیّت نہ ہو۔ اپنی تعریف سننے کی غرض سے مال خرچ کرنا اپنے مال کو برباد کرنا ہے، کیونکہ لوگ زیادہ سے زیادہ ایک دفعہ تعریف کر دیں گے، دو دفعہ تعریف کر دیں گے، اور وہ الفاظ بھی ہوا میں تحلیل ہو جائیں گے، ہاتھ میں کچھ نہ آئے گا۔ اور آخرت میں ایسے خرچ کرنے کا کوئ اجر نہیں، اس لئے مال خرچ بھی کیا اور وہ ضائع بھی ہوا۔ 

اس جگہ "لَا يُؤۡمِنُ بِٱللَّهِ هِ وَٱلۡيَوۡمِ ٱلۡأَخِرِ‌ۖ" (الّٰلہ اور یومِ آخرت پر ایمان نہیں رکھتا) کے اضافہ سے شاید اس طرف اشارہ کرنا مقصود ہے کہ جو شخص الّّٰلہ تعالیٰ اور یومِ آخرت پر ایمان رکھے اس سے اس بات کی توقّع نہیں کی جا سکتی کہ وہ ریاکاری اور لوگوں کو دکھانے کی نیّت سے کوئ کام کرے، ریا کاری اس بات کی علامت ہے کہ ابھی اس شخص کا ایمان پختہ نہیں ہوا۔

ماخوذ از معارف القرآن، از مفتی محمد شفیع رحمتہ الّٰلہ علیہ

رسم پرستی کے نقصانات

ہمارے معاشرے میں اور بہت سی رسموں کی طرح یہ رسم بھی لازمی ہو گئ ہے کہ انسان جب کسی کی عیادت کے لئے جائے تو کوئ ہدیہ، تحفہ، مثلاً پھل، بسکٹ یا جوس وغیرہ لے کر جانا لازمی ہو گیا ہے۔ اور یہ اتنا ضروری ہے کہ بعض دفعہ جب یہ کچھ لے کر جانے کی استطاعت نہیں ہوتی تو لوگ عیادت کے لئے ہی نہیں جاتے، اور دل میں خیال ہوتا ہے کہ اگر خالی ہاتھ چلے گئے تو مریض یا اس کے گھر والے کیا سوچیں گے کہ یہ ایسے ہی خالی ہاتھ آ گئے۔ یہ ایسی رسم ہے کہ جس نے ہمیں عیادت کے عظیم ثواب سے محروم کر دیا ہے۔ عیادت کے لئے تحفہ لے کر جانا نہ فرض ہے، نہ واجب ہے اور نہ سنّت۔ پھر ہم نے نہ جانے کیوں خود ہی اس کو اپنے لئے فرض قرار دے دیا ہے۔ ایسی رسمیں جن کی شریعت میں کچھ حیثیت نہ ہو، جب ان کی وجہ سے دین کے کاموں میں خلل پڑنے لگے تو انہیں چھوڑ دینا بہتر ہے۔

ماخوذ از بیان "بیمار کی عیادت کے آداب"، از مفتی محمد تقی عثمانی دامت برکاتہم

Saturday, 6 May 2017

سورہٴ البقرہ: ٢٦١ تا ٢٦٤ ۔ چھٹا حصّہ

چوتھی آیت میں بھی اسی مضمون کو دوسرے عنوان سے اور بھی تاکید کے ساتھ اس طرح ارشاد فرمایا کہ اپنے صدقات کو برباد نہ کرو، زبان سے احسان جتلا کر یا برتاؤ سے ایذاء پہنچا کر۔

قرآن کا اسلوب یہ ہے کہ زیادہ تر معاملات میں اصول کی تعلیم کی گئ ہے اور فروع کی تفصیل رسول الّلہ ﷺ کی احادیث میں ملتی ہے، یہاں تک کہ نماز جیسی عظیم عبادت کے لئے بھی حالانکہ قرآن میں بہت جگہ نماز پڑھنے کی تاکید آئ ہے، لیکن اس کی تفصیل کہ فجر میں کتنی رکعات پڑھنی ہیں، ظہر میں کتنی رکعات پڑھنی ہیں، کھڑے ہو کے کیا پڑھنا ہے، بیٹھ کے کیا پڑھنا ہے، یہ سب ہمیں احادیث سے اور رسول الّٰلہ ﷺ کی سنّت سے پتہ چلتا ہے۔ یہاں اس بات کے قرآن میں بار بار دوہرائے جانے سے کہ جس کو صدقہ دو، اس پہ زبان سے احسان نہ جتلاؤ، اور نہ ہی اسے اپنے رویّے سے تکلیف پہنچاؤ، الّٰلہ تعالیٰ کے نزدیک اس بات کی عظیم اہمیت معلوم ہوتی ہے۔

اس سے یہ واضح ہو گیا کہ جس صدقہ و خیرات کے بعد انسان احسان جتلائے یا مستحقین کو اذیّت پہنچائے، وہ صدقہ ضائع ہو گیا، اس کا کوئ ثواب نہیں۔

ماخوذ از معارف القرآن، از مفتی محمد شفیع رحمتہ الّٰلہ علیہ

Thursday, 4 May 2017

سورہٴ البقرہ: ٢٦١ تا ٢٦٤ ۔ پانچواں حصّہ

دوسری آیت میں صدقہ کرنے کے صحیح اور مسنون طریقے کا بیان اس طرح فرمایا گیا ہے کہ جو لوگ الّٰلہ کی راہ میں خرچ کرنے کےبعد نہ احسان جتاتے ہیں، اور نہ جن کو صدقہ دیا گیا ہے ان کو کوئ تکلیف پہنچاتے ہیں ان کا ثواب ان کے رب کے پاس محفوظ ہے، نہ ان پر آئندہ کے لئے کوئ خطرہ ہے اور نہ ماضی پہ کوئ رنج و غم۔  

اس آیت میں صدقہ کے قبول ہونے کی دو منفی شرطیں بتائ گئ ہیں، یعنی وہ کام جو نہیں کرنے ہیں۔ پہلی شرط تو یہ کہ صدقہ دے کر احسان نہ جتائیں۔ دوسری یہ کہ جس کو صدقہ دیں اس کو عملاً ذلیل و خوار نہ سمجھیں، اور کوئ ایسا برتاؤ نہ کریں جس سے وہ اپنی حقارت و ذلّت محسوس کرے یا اس کی دلآزاری ہو۔ 

تیسری آیت "قَوۡلٌ۬ مَّعۡرُوفٌ۬" اسی بات کی مزید  تفصیل بیان کی گئ ہے کہ اگر کبھی کوئ سوال کرے اور اس وقت انسان کی ایسی حیثیت نہ ہو کہ دوسرے کی مدد کر سکے تو نرمی سے عذر کر دے کہ بھائ اس وقت میرے پاس مال نہیں ہے۔ بالفرض اگر سوال کرنے والا اپنی بدتمیزی سے غصّہ بھی دلا دے تو اس کی بدتمیزی سے درگزر کرنا اور خاموش رہنا ایسی خیرات دینے سے کہیں بہتر ہے جس کے دینے کے بعد انسان خیرات لینے والے کو اذیّت و تکلیف پہنچائے۔ 

یاد رکھنے کی بات ہے کہ الّٰلہ تعالیٰ غنی و حلیم ہیں۔ ان کے لئے اس پوری دنیا کی حیثیت ایک مچھر کے پر کے برابر بھی نہیں۔ اگر انسان کسی نادار پہ مال خرچ کرتا ہے تو اس سے الّٰلہ تعالیٰ کے خزانے میں کوئ اضافہ نہیں ہوتا۔ انسان جو خرچ کرتا ہے، اپنے فائدے،اپنی آخرت کو بہتر بنانے کے لئے خرچ کرتا ہے۔ اسی لئے کسی دوسرے کو دیتے ہوئے بھی انسان کو یاد رکھنا چاہیے کہ میں اس پہ کوئ احسان نہیں کر رہا، میں تو اپنے ذاتی فائدے کے لئے یہ مال خرچ کر رہا ہوں۔ مجھے تو اس کا مشکور ہونا چاہیے کہ یہ مجھ سے مال لے کے مجھے اخروی فائدہ پہنچا رہا ہے۔ اگر انسان یہ سوچ رکھ کے خرچ کرے گا تو کبھی دوسروں کی طرف سے ناشکری بھی ہو گی تو عفو و درگذر سے کام لے گا۔

ماخوذ از معارف القرآن، از مفتی محمد شفیع رحمتہ الّٰلہ علیہ

سورہٴ البقرہ: ٢٦١ تا ٢٦٤ ۔ چوتھا حصّہ

عام اعمالِ صالحہ اور خصوصاً انفاق فی سبیل الّٰلہ (الّٰلہ کے راستے میں مال خرچ کرنا) کی مقبولیت اور اس کے ثواب میں اضافے کے لئے تین شرطیں ہیں۔

پہلی شرط یہ ہے کہ انسان جو مال الّٰلہ کی راہ میں خرچ کرے وہ پاک اور حلال ہو، کیونکہ حدیث شریف میں ہے کہ الّٰلہ تعالیٰ پاک اور حلال مال کے سوا کسی چیز کو قبول نہیں فرماتے۔ اس میں آج کے زمانے کے ان لوگوں کے لئے بڑی تنبیہ ہے جو حرام ذرائع سے مال کمانے کے بعد اس میں سے کچھ حصّہ صدقہ اور خیرات کی نیّت سے نکال دیتے ہیں اور بزعمِ خود یہ سمجھ لیتے ہیں کہ میرا باقی مال پاک ہو گیا۔ سمجھنے کی بات یہ ہے کہ جس مال کا صدقہ بذاتِ خود الّٰلہ تعالیٰ کے ہاں قبول ہی نہیں ہے اس کی وجہ سے باقی مال کیسے پاک ہو سکتا ہے۔ 

دوسری شرط یہ ہے کہ خرچ کرنے والے کی نیّت نیک ہو، یعنی اس کا مقصد صرف کسی ضرورتمند کی مدد کرنا اور الّٰلہ تعالیٰ کی رضا حاصل کرنا ہو۔ اس کی نیّت غیر الّٰلہ کو راضی کرنے کی نہ ہو مثلاً یہ نیّت نہ ہو کہ اس سے لوگ مجھے اچھا سمجھیں گے اور میرا بہت نام ہو گا، یا کوئ اور ناجائز فائدہ اٹھانا مقصود نہ ہو۔

تیسری شرط یہ ہے کہ جس پہ خرچ کرے وہ بھی صدقہ کا مستحق ہو، کسی نااہل پہ خرچ کر کے ضائع نہ کرے۔ شریعت میں اس کی اتنی اہمیت ہے کہ مثلاً زکوٰة جب تک صاحبِ نصاب کو تلاش کر کے اس کے حوالے نہ کی جائے اس وقت تک زکوٰة ادا نہیں ہوتی۔ پیسہ صرف نکالنا مقصود نہیں ہے، اس کو صحیح جگہ پہنچانا بھی مقصود ہے۔ خصوصاً جو شخص ضرورت مند ہو لیکن کسی کے آگے ہاتھ نہ پھیلاتا ہو اس کو ڈھونڈھ کر اس کی حاجت رفع کرنے کا بہت بڑا اجر ہے۔

ماخوذ از معارف القرآن، از مفتی محمد شفیع رحمتہ الّٰلہ علیہ