Wednesday, 17 May 2017

سورہٴ البقرہ: ۲۷۵ - دوسرا حصّہ

دوسرے جملے میں الّٰلہ تعالیٰ نے سود خوروں کی اس سزا کی وجہ یہ بیان فرمائ ہے کہ ان لوگوں نے دو جرم کیے، ایک تو بذریعہ سود کے حرام مال کھایا، دوسرے یہ کہ اس کے حلال ہونے پہ اصرار کیا۔ اس بات کو تھوڑی تفصیل سے سمجھنے کی ضرورت ہے۔ 

 گناہ دو طرح کے ہوتے ہیں، ایک تو وہ گناہ جن کو الّٰلہ تعالیٰ نےچھوٹے یا صغیرہ گناہ قرار دیا، اور فرمایا کہ جب انسان کسی بھی طرح کا صدقہ یا نیکی کا کام کرتا ہے، جس میں یہ تک شامل ہے کہ لوگوں سے کسی طرح کی تکلیف کو دور کردے مثلاً چلنے کے راستے سے کسی کانٹے یا جھاڑی کو ہٹا دے، تو ان صدقات کے بدلے وہ لوگوں کے صغیرہ گناہوں کو معاف فرماتے رہتے ہیں۔ دوسری طرح کے گناہ وہ ہیں جن کو الّٰلہ تعالیٰ نے بڑے گناہ یا کبیرہ گناہ قرار دیا ہے جو عام طور سے بغیر توبہ کے معاف نہیں ہوتے۔  اگر انسان صغیرہ گناہوں پر اصرار کرے اور کبھی کبھار غلطی سے ہو جانے کے بجائے ارادتاً ان کو جان بوجھ کے کرتا ہی رہے اور ان پہ نادم نہ ہو تو وہ بھی کبیرہ گناہوں میں شامل ہو جاتے ہیں، یا یہ انکار کرے کہ یہ تو گناہ ہی نہیں ہیں تو معاذ الّٰلہ بعض دفعہ کفر تک نوبت پہنچتی ہے کیونکہ اس نے الّٰلہ تعالیٰ کے صریح حکم کا انکار کیا اور اس کی مخالفت کی۔

حضرت تھانویؒ نے فرمایا ہے کہ بعض دفعہ ایسا ہوتا ہے کہ انسان کو توبہ کی توفیق ہوئ لیکن اس کی ملازمت ناجائز ہے، اور اس کے پاس آمدنی کا کوئ دوسرا ذریعہ بھی نہ ہو اور اس ملازمت کو چھوڑنے کی صورت میں گھر والوں کے لیے فاقے کی نوبت آ جائے، ایسی صورت میں اسے چاہیے کہ اس ملازمت کو چھوڑے نہیں بلکہ کرتا رہے۔ لیکن ساتھ ساتھ دل میں الّٰلہ تعالیٰ سے ندامت کا اظہار اور استغفار کرتا رہے، اور ایسی شدّومد کے ساتھ دوسری جائز ملازمت ڈھونڈتا رہے جیسے کہ ایک بیروزگار آدمی ڈھونڈتا ہے، تو ایسی صورت میں انشاٴالّٰلہ تعالیٰ اسے معاف فرما دیں گے اور اس کے لئے جائز آمدنی کا ذریعہ پیدا کر دیں گے۔

مقصود اس ساری بات کا یہ تھا کہ برا کام کرنا خود ایک گناہ ہے، لیکن اس کو  برا کام نہ سمجھنا اور اس کے صحیح ہونے پہ اصرار کرنا اس کو اور بہت بڑے گناہ میں بدل دیتا ہے۔ انسان گناہ فوراً چھوڑ نہ بھی سکے تو کم از کم اتنا تو کرے کہ اس کو دل سے گناہ سمجھتا رہے، اس پر نادم اور شرمندہ ہو، اور الّٰلہ تعالیٰ سے دعا کرتا رہے کہ یا الّٰلہ میرے لیے ایسے حالات پیدا فرما دیجئے کہ مجھے اس گناہ کو چھوڑنے کی توفیق عطا ہو جائے، تو انشاٴالّٰلہ اس برے کام کو چھوڑنے کی توفیق بھی ہو جائے گی اور اس کی نجات بھی ہو جائے گی۔

جاری ہے۔۔۔

ماخوذ از معارف القرآن، از مفتی محمد شفیع رحمتہ الّٰلہ علیہ

Tuesday, 16 May 2017

سورہٴ البقرہ: ۲۷۵ - پہلا حصّہ

اَلَّذِيۡنَ يَاۡكُلُوۡنَ الرِّبٰوا لَا يَقُوۡمُوۡنَ اِلَّا كَمَا يَقُوۡمُ الَّذِىۡ يَتَخَبَّطُهُ الشَّيۡطٰنُ مِنَ الۡمَسِّ‌ؕ ذٰ لِكَ بِاَنَّهُمۡ قَالُوۡۤا اِنَّمَا الۡبَيۡعُ مِثۡلُ الرِّبٰوا‌ ۘ‌ وَاَحَلَّ اللّٰهُ الۡبَيۡعَ وَحَرَّمَ الرِّبٰوا‌ ؕ فَمَنۡ جَآءَهٗ مَوۡعِظَةٌ مِّنۡ رَّبِّهٖ فَانۡتَهٰى فَلَهٗ مَا سَلَفَؕ وَاَمۡرُهٗۤ اِلَى اللّٰهِ‌ؕ وَمَنۡ عَادَ فَاُولٰٓٮِٕكَ اَصۡحٰبُ النَّارِ‌ۚ هُمۡ فِيۡهَا خٰلِدُوۡنَ‏ ﴿۲۷۵﴾ 

"جو لوگ سود کھاتے ہیں وہ (قیامت میں) اٹھیں گے تو اس شخص کی طرح اٹھیں گے جسے شیکطان نے چھو کر پاگل بنا دیا ہو۔ یہ اس لئے ہو گا کہ انہوں نے کہا تھا کہ: "بیع بھی تو سود ہی کی طرح ہوتی ہے۔" حالانکہ الّٰلہ نے بیع کو حلال کیا ہے اور سود کو حرام قرار دیا ہے۔ لہذا جس شخص کے پاس اس کے پروردگار کی طرف سے نصیحت آ گئ اور وہ (سودی معاملات سے) باز آ گیا تو ماضی میں جو کچھ ہوا وہ اسی کا ہے۔ اور اس (کی باطنی کیفیت) کا معاملہ الّٰلہ کے حوالے ہے۔ اور جس شخص نے لوٹ کر پھر وہی کام کیا تو ایسے لوگ دوزخی ہیں۔ وہ ہمیشہ اسی میں رہیں گے۔"

سود یا رِبا ہر اس زیادہ رقم کو کہا جاتا ہےجو کسی قرض پر طے کر کے وصول کی جائے۔ مشرکین کا کہنا تھا کہ جس طرح ہم کوئ سامان فروخت کر کے نفع کماتے ہیں اور اس کو شریعت نے حلال قرار دیا ہے، اسی طرح اگر قرض دے کر کوئ نفع کمائیں تو کیا حرج ہے؟ ان کے اس اعتراض کا جواب تو یہ تھا کہ سامانِ تجارت کا تو مقصد ہی یہ ہے کہ اسے بیچ کر نفع کمایا جائے، لیکن نقدی اس کام کے لئے نہیں بنائ گئ کہ اسے سامانِ تجارت بنا کر اس سے نفع کمایا جائے۔ وہ تو ایک تبادلے کا ذریعہ ہے تا کہ اس کے ذریعے اشیائے ضرورت خریدی اور بیچی جا سکیں۔ نقدی کا نقدی سے تبادلہ کر کے اسے بذاتِ خود نفع کمانے کا ذریعہ بنا لیا جائے تو اس سے بے شمار مفاسد پیدا ہوتے ہیں۔(اس کی پوری تفصیل رسالہ "سود پر تاریخی فیصلہ" میں موجود ہے۔)

جاری ہے۔۔۔

ماخوذ از آسان ترجہ القرآن، از مفتی محمد تقی عثمانی دامت برکاتہم

Monday, 15 May 2017

سورہٴ البقرہ: ٢٧٤

اَلَّذِيۡنَ يُنۡفِقُوۡنَ اَمۡوَالَهُمۡ بِالَّيۡلِ وَالنَّهَارِ سِرًّا وَّعَلَانِيَةً فَلَهُمۡ اَجۡرُهُمۡ عِنۡدَ رَبِّهِمۡ‌ۚ وَلَا خَوۡفٌ عَلَيۡهِمۡ وَلَا هُمۡ يَحۡزَنُوۡنَؔ۔

"جو لوگ اپنے مال دن رات خاموشی سے بھی اور علانیہ بھی خرچ کرتے ہیں وہ اپنے پروردگار کے پاس اپنا ثواب پائیں گے، اور نہ انہیں کوئ خوف لاحق ہو گا، نہ کوئ غم پہنچے گا۔"

اس آیت میں ان لوگوں کے اجرِ عظیم اور فضیلت کا بیان ہے جو الّٰلہ کی راہ میں خرچ کرنے کے عادی ہیں، تمام حالات و اوقات میں، رات میں اور دن میں، خفیہ بھی اور لوگوں کے سامنے بھی ہر حالت میں اپنا مال الّٰلہ کی راہ میں خرچ کرتے رہتے ہیں۔ اس ضمن میں یہ بھی بتلا دیا کہ صدقہ و خیرات کے لئے کوئ وقت مقرّر نہیں۔ اسی طرح سے چھپ کے بھی اور لوگوں کے سامنے بھی، دونوں طرح سے الّٰلہ کی راہ میں خرچ کرنے کا ثواب ملتا ہے، بشرطیکہ اخلاص کے ساتھ خرچ کیا جائے۔ نیّت صرف یہ ہو کہ انسان لوگوں کو آرام پہنچائے، ان کی تکلیف دور کرے، الّٰلہ تعالیٰ کو راضی کرنا اور ثواب حاصل کرنا مقصود ہو، شہرت کمانا یا دوسروں کے منہ سے اپنی تعریف سننا مقصد نہ ہو۔ 

اسی ضمن میں ایک اور بات سمجھنے کی یہ ہے کہ لوگ جب رمضان المبارک کے مہینے میں نیک اعمال کرنے کی فضیلت سنتے ہیں تو اس میں بعض دفعہ اس حد تک غلو کرنے لگتے ہیں کہ اپنے سامنے دوسروں کو شدید تنگی میں مبتلا دیکھتے ہیں، ان کی مدد بھی کر سکتے ہیں، لیکن یہ سوچ کے نہیں کرتے کہ رمضان المبارک میں مال خرچ کریں گے تو زیادہ ثواب ملے گا۔ انسان جب کسی دوسرے انسان کو تکلیف میں مبتلا دیکھے تو اس وقت اس کی تکلیف دور کرنے کا جو ثواب ہے وہ بہت کم اعمال کا ہے، اور اس میں مسلم اور غیر مسلم کی بھی قید نہیں۔ ایسے موقع کو چھوڑنا نہیں چاہیے اور اگر اپنے اختیار میں ہو تو دوسرے کی تکلیف اور تنگی فوراً دور کرنے کی کوشش کرنی چاہئے۔ انشاٴالّٰلہ ایسے موقع پہ مال خرچ کرنے کا جو اجر ملے گا وہ شاید رمضان میں بھی خرچ کرنے سے نہ ملتا۔

ماخوذ از معارف القرآن، از مفتی محمد شفیع رحمتہ الّٰلہ علیہ

Sunday, 14 May 2017

سورہٴ البقرہ: ۲۷۳

لِلۡفُقَرَآءِ ٱلَّذِينَ أُحۡصِرُواْ فِى سَبِيلِ ٱللَّهِ لَا يَسۡتَطِيعُونَ ضَرۡبً۬ا فِى ٱلۡأَرۡضِ يَحۡسَبُهُمُ ٱلۡجَاهِلُ أَغۡنِيَآءَ مِنَ ٱلتَّعَفُّفِ تَعۡرِفُهُم بِسِيمَـٰهُمۡ لَا يَسۡـَٔلُونَ ٱلنَّاسَ إِلۡحَافً۬ا‌ۗ وَمَا تُنفِقُواْ مِنۡ خَيۡرٍ۬ فَإِنَّ ٱللَّهَ بِهِۦ عَلِيمٌ۔

"(مالی امداد کے بطورِ خاص) مستحق وہ فقراء ہیں جنہوں نے اپنے آپ کو الّٰلہ کی راہ میں اس طرح مقیّد کر رکھا ہے کہ وہ (معاش کی تلاش کے لئے) زمین میں چل پھر نہیں سکتے۔ چونکہ وہ اتنے پاک دامن ہیں کہ کسی سے سوال نہیں کرتے، اس لئے ناواقف آدمی انہیں مالدار سمجھتا ہے۔ تم ان کے چہرے کی علامتوں سے ان (کی اندرونی حالت) کو پہچان سکتے ہو (مگر) وہ لوگوں سے لگ لپٹ کر سوال نہیں کرتے۔ اور تم جو مال بھی خرچ کرتے ہو الّٰلہ اسے خوب جانتا ہے۔"

حضرت ابنِ عبّاس رضی الّٰلہ عنہ سے روایت ہے کہ یہ آیت اصحابِ صفّہ کے بارے میں نازل ہوئ ہے۔ یہ وہ صحابہ تھے جنہوں نے اپنی زندگی علمِ دین حاصل کرنے کے لیے وقف کر دی تھی، اور آنحضرت ﷺ کے پاس مسجدِ نبوی سے متصّل ایک چبوترے پر آ پڑے تھے۔ طلبِ علم کی وجہ سے وہ کوئ معاشی مشغلہ اختیار نہیں کر سکتے تھے، مگر مفلسی کی سختیاں ہنسی خوشی برداشت کرتے تھے، کسی سے مانگنے کا سوال نہیں تھا۔ اس آیت نے بتایا کہ ایسے لوگ امداد کے زیادہ مستحق ہیں جو ایک نیک مقصد سے پوری امّت کے فائدے کے لیے مقید ہو کر رہ گئے ہیں اور سختیاں جھیلنے کے باوجود اپنی ضرورت کسی کے سامنے ظاہر نہیں کرتے۔ (آسان ترجمہٴ قرآن، ازمفتی محمد تقی عثمانی دامت برکاتہم)

بیان القرآن (تالیف مولانا اشرف علی تھانوی رحمتہ الّٰلہ علیہ) میں ہے کہ اس آیت کا مفہوم یہ ہے کہ صدقہ ان حاجت مندوں کا حق ہے جو الّٰلہ تعالیٰ کی راہ میں یعنی دین کی خدمت کے لئے مقیّد ہو گئے ہوں اور خدمتِ دین میں مقیّد اور مشغول رہنے کی وجہ سے طلبِ معاش کے لئے ملک بھر میں چلنے پھرنے کا عادتاً امکان نہیں رکھتے۔

ماخوذ از معارف القرآن، از مفتی محمد شفیع رحمتہ الّٰلہ علیہ

Saturday, 13 May 2017

سورہٴ البقرہ: ٢٧٢

لَّيۡسَ عَلَيۡكَ هُدَٮٰهُمۡ وَلَـٰڪِنَّ ٱللَّهَ يَهۡدِى مَن يَشَآءُ‌ۗ وَمَا تُنفِقُواْ مِنۡ خَيۡرٍ۬ فَلِأَنفُسِڪُمۡ‌ۚ وَمَا تُنفِقُونَ إِلَّا ٱبۡتِغَآءَ وَجۡهِ ٱللَّهِ‌ۚ وَمَا تُنفِقُواْ مِنۡ خَيۡرٍ۬ يُوَفَّ إِلَيۡڪُمۡ وَأَنتُمۡ لَا تُظۡلَمُونَ۔

"(اے پیغمبر!) ان (غیر مسلموں) کو راہِ راست پر لے آنا آپ کی ذمّہ داری نہیں ہے، لیکن الّٰلہ جس کو چاہتا ہے راہِ راست پر لے آتا ہے۔ اور جو مال بھی تم خرچ کرتے ہو وہ خود تمہارے فائدے کے لئے ہوتا ہے جبکہ تم الّٰلہ کی خوشنودی طلب کرنے کے سوا کسی اور غرض سے خرچ نہیں کرتے۔ اور جو مال بھی تم خرچ کرو گے تمہیں پورا پورا دیا جائے گا اور تم پر ذرا بھی ظلم نہیں ہو گا۔"

بہت سے صحابہ رضی الّٰلہ عنہما غیر مسلموں کو اس مصلحت سے صدقہ و خیرات نہ دیتے تھے کہ شاید اسی تدبیر سے کچھ لوگ مسلمان ہو جائیں۔ اس آیت میں بتلایا گیا ہے کہ کسی بھی غیر مسلم کو اسلام پہ لے آنا آپ ﷺ کے ذمّہ فرض و واجب نہیں۔ یہ تو صرف الّٰلہ تعالیٰ کے اختیار میں ہے کہ لوگوں کے دلوں کو بدل دے اور انہیں ایمان پر لے آئے۔ اسی سلسلےمیں آگے فرمایا گیا ہے کہ مسلمانوں کو اس وجہ سے غیر مسلموں کو صدقہ و خیرات دینے سے نہیں رکنا چاہیے۔ مسلمان جو بھی مال خرچ کرے اس میں نیّت صرف اور صرف یہ ہونی چاہئے کہ الّٰلہ تعالی راضی ہو جائیں۔ جس طرح مسلمان الّٰلہ تعالیٰ کی مخلوق ہیں اسی طرح غیر مسلم بھی الّٰلہ تعالیٰ کی مخلوق ہیں۔ جیسی الّٰلہ کی رضا مسلمان کو صدقہ و خیرات دینے سے حاصل ہو گی، بالکل ویسے ہی الّٰلہ تعالیٰ کی رضا غیر مسلم حاجتمند کو بھی صدقہ و خیرات دینے سے حاصل ہو گی۔ جب الّلہ تعالیٰ نے اس میں فرق نہیں رکھا تو ہم یہ فرق کیوں کریں کہ ثواب حاصل کرنے کی نیّت سے صدقہ و خیرات نادار مسلمان کو تو دیں لیکن نادار غیر مسلم کو نہ دیں۔

یہاں یہ جاننا ضروری ے کہ یہ آیت نفلی صدقات کے بارے میں ہے، واجب صدقات مثلاً زکوٰة کے بارے میں نہیں، کیونکہ زکوٰة صرف غریب مسلمان کا حق ہے۔ ذکوٰة کی یہ پابندیاں صرف غیر مسلموں کے لئے نہیں بلکہ بعض صورتوں میں مسلمانوں کو بھی زکوٰة دینا جائز نہیں مثلاً شوہر کا بیوی کو اور بیوی کا شوہر کو زکوٰة دینا جائز نہیں، اسی طرح بعض صورتیں اور بھی ہیں۔

ماخوذ از معارف القرآن، از مفتی محمد شفیع رحمتہ الّٰلہ علیہ

Thursday, 11 May 2017

سورہٴ البقرہ: ۲۷۱

إِن تُبۡدُواْ ٱلصَّدَقَـٰتِ فَنِعِمَّا هِىَ‌ۖ وَإِن تُخۡفُوهَا وَتُؤۡتُوهَا ٱلۡفُقَرَآءَ فَهُوَ خَيۡرٌ۬ لَّڪُمۡ‌ۚ وَيُكَفِّرُ عَنڪُم مِّن سَيِّـَٔاتِڪُمۡ‌ۗ وَٱللَّهُ بِمَا تَعۡمَلُونَ خَبِيرٌ۬۔

"اگر تم صدقات ظاہر کر کے دو تب بھی اچھا ہے؛ اور اگر ان کو چھپا کر فقراء کو دو تو یہ تمہارے حق میں کہیں بہتر ہے۔ اور الّٰلہ تمہاری برائیوں کا کفّارہ کر دے گا؛ اور الّٰلہ تمہارے تمام کاموں سے پوری طرح باخبر ہے۔"

بظاہر یہ آیت فرض اور نفل سب صدقات کو شامل ہے، اور ہر طرح کے صدقے میں چھپا کر دینا ہی افضل ہے۔ چھپا کر دینے میں اپنے لیے بھی حفاظت ہے کہ ریا جیسے گناہِ کبیرہ کے ہو جانے کا اندیشہ ختم ہو جاتا ہے اور اخلاصِ نیّت زیادہ ہوتی ہے کیونکہ سوائے دینے والے اور والے کے کسی کو پتہ نہیں چلتا کہ کس انسان نے صدقہ دیا اور کتنا دیا۔ اسی طرح چھپا کر دینے میں لینے والے کی بھی حفاظت ہے کہ اس کی عزّتِ نفس محفوظ رہتی ہے اور وہ سب کے سامنے شرمندگی سے بچتا ہے۔ البتّہ اس صورت میں سب کے سامنے دینے کی بھی اجازت ہے کہ اگر اس کی امید ہو کہ دوسروں کو بھی اس کو دیکھ کر اس کی اقتداء کرنے کی ترغیب ہو گی۔

آگے اس کا جو ذکر فرمایا کہ الّٰلہ تعالیٰ تمہارے گناہوں کو معاف کر دیں گے یہ معافی صرف چھپا کر دینے کے لئے خاص نہیں, بلکہ اس کو چھپا کر دینے کے ساتھ ملا کر اس تنبیہ کے لئے فرمایا کہ اگر تمہیں چھپا کر دینے میں تنگی ہو کہ اس کا کوئ ظاہری فائدہ تو ہوا نہیں تو اپنا دل چھوٹا مت کرو کیونکہ الّٰلہ تعالیٰ تمہارے گناہ معاف کر دیں گے اور اس سے بڑا فائدہ کیا ہو سکتا ہے۔

ماخوذ از معارف القرآن، از مفتی محمد شفیع رحمتہ الّٰلہ علیہ

Wednesday, 10 May 2017

سورہٴ البقرہ: ٢٦٨

ٱلشَّيۡطَـٰنُ يَعِدُكُمُ ٱلۡفَقۡرَ وَيَأۡمُرُڪُم بِٱلۡفَحۡشَآءِ‌ۖ وَٱللَّهُ يَعِدُكُم مَّغۡفِرَةً۬ مِّنۡهُ وَفَضۡلاً۬‌ۗ وَٱللَّهُ وَٲسِعٌ عَلِيمٌ۬.

"شیطان تمہیں مفلسی سے ڈراتا ہے اور تمہیں بے حیائ کا حکم دیتا ہے؛ اور الّٰلہ تم سے اپنی مغفرت اور فضل کا وعدہ کرتا ہے۔ الّٰلہ بڑی وسعت والا، ہر بات جاننے والا ہے۔"

جب انسان کےدل میں اس طرح کے خیالات آنے لگیں کہ میں اگر صدقہ و خیرات کروں گا تو میرے مال میں کمی ہو جائے گی، اور میں مفلس ہو جاؤں گا، اور حقِ تعالیٰ کی یہ تاکید سن کر بھی جس میں بار بار مستحق لوگوں پر اپنا مال خرچ کرنے کی ترغیب دلائ گئ ہے، اس کی مال خرچ کرنے کی ہمّت نہ ہو اور دل چاہے کہ اپنا مال خرچ نہ کرے اور بچا بچا کر رکھے، تو اس کو یقین کر لینا چاہئے کہ اس کے دل میں یہ خیالات شیطان کی طرف سے آ رہے ہیں۔ دوسری طرف اس کے دل میں اگر اس طرح کے خیالات آئیں کہ صدقہ و خیرات سے گناہ بخشے جائیں گے، اور مال میں بھی ترقّی اور برکت ہو گی، تو اس کو سمجھ لینا چاہیے کہ یہ خیالات الّٰلہ کی طرف سے آ رہے ہیں۔

ماخوذ از معارف القرآن، از مفتی محمد شفیع رحمتہ الّٰلہ علیہ