Friday, 26 May 2017

سورہٴ البقرہ: ۲۷۹ - دوسرا حصّہ

اس آیت کا دوسرا جملہ ہے "وَاِنۡ تُبۡتُمۡ فَلَـكُمۡ رُءُوۡسُ اَمۡوَالِكُمۡ‌ۚ لَا تَظۡلِمُوۡنَ وَلَا تُظۡلَمُوۡنَ" یعنی "اگر تم توبہ کر لو اور آئندہ کے لیے سود کی باقی رقم چھوڑنے کا عزم کر لو تو تمہیں تمہارا اصل راٴس المال واپس مل جائے گا۔ نہ تم اصل مال سے زائد وصول کر کے کسی پر ظلم کر پاؤ گے، اور نہ کوئ اصل راس المال میں کمی یا دیر کر کے تم پر ظلم کر پائے گا۔" اس میں اصل راٴس المال واپس ملنے کو اس شرط کے ساتھ مشروط کیا ہے کہ انسان توبہ کر لے اور آئندہ کے لیے سود چھوڑنے کا عزم کرے، تب اصل راٴس المال ملے گا۔

ماخوذ از معارف القرآن، از مفتی محمد شفیع رحمتہ الّٰلہ علیہ

Thursday, 25 May 2017

سورہٴ البقرہ: ۲۷۹ - پہلا حصّہ

فَاِنۡ لَّمۡ تَفۡعَلُوۡا فَاۡذَنُوۡا بِحَرۡبٍ مِّنَ اللّٰهِ وَرَسُوۡلِهٖ‌ۚ وَاِنۡ تُبۡتُمۡ فَلَـكُمۡ رُءُوۡسُ اَمۡوَالِكُمۡ‌ۚ لَا تَظۡلِمُوۡنَ وَلَا تُظۡلَمُوۡنَ۔

"پھر بھی اگر تم ایسا نہ کرو گے (اس کا ربط پچھلی آیت سے ہے جس میں سود چھوڑنے کا حکم دیا گیا تھا) تو الّٰلہ اور اس کے رسول کی طرف سے اعلانِ جنگ سن لو۔ اور اگر تم (سود سے) توبہ کرو تو تمہارا اصل سرمایہ تمہارا حق ہے۔ نہ تم کسی پر ظلم کرو، نہ تم پر ظلم کیا جائے۔"

یہ وعید اتنی شدید ہے کہ کفر کے سوا کسی اور بڑے سے بڑے گناہ پر قرآن کریم میں ایسی وعید نہیں آئ۔ الّٰلہ تعالیٰ ہم سب مسلمانوں کو اس کا مصداق بننے سے بچائے، اور ہم میں سے جو لوگ اس لعنت میں مبتلا ہیں ان کو جلد از جلد اس مصیبت سے نکلنے کی توفیق عطا فرمائے۔ آمین۔ کون مسلمان ایسا ہوگا جو الّٰلہ پر ایمان رکھتا ہو، الّٰلہ کے رسول ﷺ پر ایمان رکھتا ہو، اس بات پر ایمان رکھتا ہو کہ قرآن کریم الّٰلہ تعالیٰ کی کتاب ہے، اور اس کا دل اس تنبیہ کو سن کر نہ کانپ اٹھے۔ 

ماخوذ از معارف القرآن، از مفتی محمد شفیع رحمتہ الّٰلہ علیہ

Wednesday, 24 May 2017

سورہٴ البقرہ: ۲۷۸

يٰۤـاَيُّهَا الَّذِيۡنَ اٰمَنُوا اتَّقُوا اللّٰهَ وَذَرُوۡا مَا بَقِىَ مِنَ الرِّبٰٓوا اِنۡ كُنۡتُمۡ مُّؤۡمِنِيۡنَ‏۔

"اے ایمان والو! الّٰلہ سے ڈرو اور اگر تم واقعی موٴمن ہو تو سود کا جو حصّہ بھی (کسی کے ذمّے) باقی رہ گیا ہو اسے چھوڑ دو۔ 

اس آیت کو شروع اس طرح کیا گیا کہ مسلمانوں کو خطاب کر کے اوّل  اتَّقُوا اللّٰہ کا حکم سنایا کہ الّٰلہ سے ڈرو، اس کے بعد اصل مسئلے کا حکم بتلایا گیا۔ یہ قرآن ِ حکیم کا وہ خاص طرز ہے جس میں وہ دنیا بھر کی قانون کی کتابوں سے ممتاز ہے کہ جب کوئ ایسا قانون بنایا جاتا ہے جس پر عمل کرنے میں لوگوں کو کچھ دشواری معلوم ہو تو اس سے پہلے اور اس کے بعد خدا تعالیٰ کے سامنے حاضری، ان کے سامنے اعمال کے پیش کیے جانے اور آخرت کے عذاب و ثواب کا ذکر کر کے مسلمانوں کے دلوں اور ذہنوں کو اس پر عمل کرنے کے لیے تیّار کیا جاتا ہے، اس کے بعد حکم سنایا جاتا ہے۔ یہاں بھی پچھلے عائد شدہ سود کی رقم کا چھوڑ دینا انسانی طبیعت پر بار ہو سکتا تھا، اس لیے پہلے  اتَّقُوا اللّٰہ فرمایا، پھر اس کے بعد حکم دیا کہ سود کا جو حصّہ بھی باقی ہے اس کو چھوڑ دو، اور آیت کے آخر میں فرمایا اِنۡ كُنۡتُمۡ مُّؤۡمِنِيۡنَ، یعنی اگر تم ایمان والے ہو۔ اس میں اشارہ اس طرف کر دیا کہ ایمان کا تقاضہ یہ ہے کہ حکمِ خداوندی کی اطاعت کی جائے۔ (معارف القرآن)

تشریح: تقوٰی کا مفہومِ ِ اصلی یہی ہے کہ ایسا ڈر جس کی وجہ سے انسان کسی کام کو چھوڑ دے، کسی کام سے رک جائے۔ قرآن میں بار بار اس کی تاکید آئ ہے کہ تقوٰی پیدا کرو، الّٰلہ سے ڈرو۔ اس کی وجہ یہی ہے کہ جب انسان کے دل میں یہ احساس بیٹھ جاتا ہے کہ الّٰلہ تعالیٰ ہر وقت دیکھ رہے ہیں تو وہ خود بخود ان کی نافرمانی سے رکنے لگتا ہے۔ اس کی مثال بلا تشبیہ ایسی ہے کہ ہم بہت سے گناہ ایسے کرتے ہیں کہ اگر اس وقت والدین سامنے سے آ جائیں تو ہم ان کے سامنے وہ کام کرنے سے شرما جائیں، رک جائیں۔ الّٰلہ کی ذات تو والدین کی ذات سے بہت بڑی ہے۔ 

حضرت عمر رضی الّٰلہ عنہ جب خلیفہ تھے تو ایک دفعہ شہر سے باہر کہیں گئے۔ وہاں بھوک لگی تو کھانے کو کچھ تھا نہیں۔ وہاں ایک گڈریا بکریاں چرا رہا تھا۔ حضرت عمرؓ نے اس سے پوچھا کہ تمہاری اجازت ہو تو ہم ایک بکری کو دوہ کے اس کا دودھ پی لیں؟ اس نے جواب دیا کہ جناب، یہ بکریاں میری نہیں ہیں، ان کا مالک تو کوئ اور ہے، میں تو صرف معاوضے پر انہیں چراتا ہوں، اسی لیے میں مالک کی اجازت کے بغیر آپ کو ان کا دودھ دوہنے کی اجازت نہیں دے سکتا۔ حضرت عمر ؓ نے امتحاناً اس سے کہا کہ میں تمہیں ایک ایسی بات بتاتا ہوں جس میں تمہارا بھی فائدہ اور میرا بھی فائدہ۔ وہ یہ کہ تم ایک بکری مجھے بیچ دو۔ ہم اس کا دودھ پی لیں گے اور اسے کاٹ کر کھا لیں گے۔ ہمارا پیٹ بھر جائے گا اور تمہیں معاوضتاً رقم مل جائے گی۔ اگر مالک پوچھے تو کہہ دینا کہ بھیڑیا کھا گیا۔ اور بھیڑیے تو بکریوں کو کھاتے ہی رہتے ہیں اس لیے مالک کو تمہاری بات پہ شک بھی نہیں ہو گا۔ جب گڈریے نے یہ سنا تو بے اختیار یہ پکار اٹھا، "اے شہزادے! پھر الّٰلہ کہاں گیا؟"

یہ ہے اصل تقوٰی کہ جہاں کوئ دیکھنے اور نگرانی کرنے والا نہیں وہاں بھی دل میں احساس بیٹھا ہوا ہے کہ الّٰلہ تعالیٰ دیکھ رہے ہیں اس لیے حرام کھانے کا تصوّر بھی ذہن میں نہیں آتا۔ افسوس کہ جتنا ہم لوگ رسول الّٰلہ ﷺ کے زمانے سے دور ہوتے گئے اتنا ہم میں ایسا اخلاقی انحطاط آتا گیا کہ آج ہم میں سے بظاہر بہت دینی اور مذہبی لوگوں میں بھی وہ تقوٰی اور وہ حرام حلال کی فکر باقی نہ رہی جو اس زمانے میں ایک چرواہے میں تھی۔

Monday, 22 May 2017

سورہٴ البقرہ: ۲۷۷

اِنَّ الَّذِيۡنَ اٰمَنُوۡا وَعَمِلُوا الصّٰلِحٰتِ وَاَقَامُوا الصَّلٰوةَ وَاٰتَوُا الزَّكٰوةَ لَهُمۡ اَجۡرُهُمۡ عِنۡدَ رَبِّهِمۡ‌ۚ وَلَا خَوۡفٌ عَلَيۡهِمۡ وَلَا هُمۡ يَحۡزَنُوۡنَ‏۔

"وہ لوگ جو ایمان لائیں، نیک عمل کریں، نماز قائم کریں اور زکوٰة ادا کریں، وہ اپنے ربّ کے پاس اپنے اجر کے مستحق ہوں گے؛ نہ انہیں کوئ خوف لاحق ہو گا، نہ کوئ غم پہنچے گا۔"

اس آیت میں موٴمنین صالحین جو نماز و زکوٰة کے پابند ہیں ان کے اجرِ عظیم اور آخرت کی راحت کا ذکر ہے۔ "خَوۡفٌ" آئندہ پیش آنے والی کسی تکلیف و مصیبت کے اندیشہ کا نام ہے، اور "حزن" کسی مقصد و مراد کے فوت ہو جانے سے پیدا ہونے والے غم کو کہا جاتا ہے۔ غور کیا جائے تو عیش و راحت کی تمام انواع و اقسام کا ان دو لفظوں میں ایسا احاطہ کر دیا گیا ہے کہ آرام و آسائش کی کوئ جزئ اور کوئ قسم اس سے باہر نہیں۔ (از معارف القرآن)

حضرت سفیان ثوریؒ فرماتے ہیں کہ الّٰلہ تعالیٰ نے ہم لوگوں کو محض اپنے فضل سے علم کی، عبادت کی، اور الّٰلہ کی یاد اور ذکر کی جو لذّت عطا فرمائ ہوئ ہے اگر اس لذّت کی اطلاع اور خبر بادشاہوں کو ہو جائے تو وہ تلواریں سونت کر ہمارے پاس آ جائیں کہ یہ لذّت ہمیں دے دو۔

 آج کل لوگ طرح طرح کی نفسیاتی بیماریوں میں مبتلا ہیں، اس کے لئے کیا کیا علاج کرتے ہیں، اور پھر بھی اداسی اور پریشانی دور نہیں ہوتی۔ الّٰلہ تعالیٰ نے قرآن کریم میں جگہ جگہ موٴمنین اور صالحین کے لیے یہ وعدہ فرمایا ہے کہ نہ ان کو کوئ خوف لاحق ہو گا اور نہ انہیں کوئ غم پہنچے گا۔ اس کا مطلب یہ نہیں کہ ان کی زندگی میں پریشانیاں نہیں آتیں یا صدمے نہیں آتے، اس کا مطلب یہ ہے کہ جو دل الّٰلہ تعالیٰ سے راضی ہو جاتا ہے پھر اسے الّٰلہ تعالیٰ کی طرف سے آنے والے کسی بھی واقعے پر طبعی پریشانی یا اداسی تو ہوتی ہے لیکن عقلی اداسی یا پریشانی نہیں ہوتی، کیونکہ وہ ہر حال میں الّٰلہ کی رضا پہ راضی ہوتا ہے۔ انسان علاج کے طور پہ ہی صحیح لیکن ایک دفعہ ان آیتوں پہ عمل کر کے تو دیکھے۔ پھر انشاٴالّٰلہ اسے دل کی وہ لذّت حاصل ہو گی کہ الّٰلہ تعالیٰ اسے دنیا میں ہی وَلَا خَوۡفٌ عَلَيۡهِمۡ وَلَا هُمۡ يَحۡزَنُوۡنَ‏ کی نعمت عطا فرما دیں گے۔

Sunday, 21 May 2017

سورہٴ البقرہ: ۲۷٦ - دوسرا حصّہ

اس آیت کے آخر میں الّٰلہ تعالی نے ارشاد فرمایا: "وَاللّٰهُ لَا يُحِبُّ كُلَّ كَفَّارٍ اَثِيۡمٍ"۔ "الّٰلہ تعالیٰ پسند نہیں کرتے کسی کفر کرنے والے کو کسی گناہ کا کام کرنے والے کو۔"

اس میں اشارہ فرما دیا کہ جو لوگ سود کو حرام ہی نہ سمجھیں وہ کفر میں مبتلا ہیں، اور جو حرام سمجھنے کے باوجود عملاً اس میں مبتلا ہیں وہ گناہ گار فاسق ہیں۔ اس کی تفصیل کچھ یوں ہے۔

انسان جتنے بھی بڑے گناہ میں مبتلا ہو وہ گناہ گار تو ہوتا ہے لیکن جب تک وہ اسے دل میں گناہ سمجھتا رہے کافر نہیں ہوتا۔ ویسے تو یہ الّٰلہ تعالیٰ ہی جانتے ہیں کہ کون صاحبِ ایمان ہے، کون کافر، اور کون منافق، کیونکہ ایمان تو دل کے اندر ہوتا ہے اور کسی کے دل کا حال کسی دوسرے کو نہیں معلوم، لیکن شریعت کے اعتبار سے انسان کافر اسی وقت ہوتا ہے جب وہ الّٰلہ تعالیٰ کے دیے ہوئے یا رسول الّٰلہ ﷺ کے بتائے ہوئے کسی واضح صریح حکم کا انکار کرے اور یا تو یہ کہے کہ یہ تو گناہ ہی نہیں ہے، یا اس کو دلائل سے صحیح ثابت کرنے کی کوشش کرے۔ اگر انسان کو اپنی غلطی کا احساس ہو جائے اور وہ اپنے گناہوں کو چھوڑنا چاہے لیکن سب گناہ ایک ساتھ نہ چھوڑ سکے، تو اتنا تو کرے کہ ان کو دل میں غلط سمجھنا شروع کر دے اور الّٰلہ تعالیٰ سے دعا کرتا رہے کہ یا الّٰلہ! میں ان گناہوں میں مبتلا ہوں۔ ابھی مجھ میں ان کو چھوڑنے کی طاقت نہیں ہے۔ آپ اپنے فضل و کرم سے مجھے ان کو چھوڑنے کی توفیق عطا فرما دیجئے۔ (آمین) یہ کرنا تو کسی وقت بھی کسی انسان کے اختیار سے باہر نہیں۔ ان گناہوں کو غلط سمجھنے سے انکار اور ان کو صحیح ثابت کرنے پہ اصرار نہ کرے کیونکہ جب اصرار کرتا ہے تو پھر بعض دفعہ توبہ کی توفیق بھی نہیں ملتی۔

آج بعض دفعہ مسلمانوں کی زبان سے سننے میں آتا ہے کہ سود تو اتنا عام ہو گیا ہے کہ اس سے بچنا اب ممکن نہیں رہا۔ علماء کو چاہیے کہ اسے حلال قرار دے دیں۔ (معاذ الّٰلہ) ان کو شاید یہ خیال نہیں رہتا کہ جس بات کو خود الّٰلہ تعالیٰ نے قرآن کریم میں، صرف ایک جگہ نہیں بلکہ بار بار، حرام قرار دیا ہے کوئ بھی مولوی، مفتی یا عالم اسے کیسے حلال قرار دے سکتا ہے۔

ماخوذ از معارف القرآن، از مفتی محمد شفیع رحمتہ الّٰلہ علیہ

Saturday, 20 May 2017

سورہٴ البقرہ: ۲۷٦ - پہلا حصّہ

يَمۡحَقُ اللّٰهُ الرِّبٰوا وَيُرۡبِى الصَّدَقٰتِ‌ؕ وَاللّٰهُ لَا يُحِبُّ كُلَّ كَفَّارٍ اَثِيۡمٍ۔ 

"الّٰلہ سود کو مٹاتا ہے اور صدقات کو بڑھاتا ہے۔ اور الّٰلہ ہر اس شخص کو ناپسند کرتا ہے جو ناشکرا گناہگار ہو۔" 

یہاں سود کے ساتھ صدقات کا ذکر ایک خاص مناسبت سے لایا گیا ہے کہ سود اور صدقہ دونوں کی حقیقت میں بھی تضاد ہے، اور ان کے نتائج بھی متضاد ہیں۔

حقیقت کا تضاد تو یہ ہے کہ صدقے میں اپنا مال بغیر کسی معاوضے کے اور بغیر کسی بدلے کی امید کے دوسرے کو دے دیا جاتا ہے، اور سود میں بغیر کسی محنت کے، اور بغیر اس کے عوض میں کچھ دیے دوسرے کا مال لے لیا جاتا ہے۔ ان دونوں کے کرنے والوں کی نیّت میں یہ تضاد ہے کہ صدقہ دینے والا تو الّٰلہ تعالیٰ کی رضا اور ثوابِ آخرت کی امید پہ اپنے مال کو ظاہری اعتبار سے کم یا ختم کرنے کا فیصلہ کرتا ہے، جبکہ سود لینے والے کی نیّت یہ ہوتی ہے کہ کسی قسم کا خطرہ مول لیے اور کسی قسم کی محنت کیے بغیر اس کے مال میں اضافہ ہو جائے۔ قرآن کریم کی اس آیت کا مطلب یہ ہوا کہ صدقہ دینے والا جس کے مال میں بظاہر کمی ہونی چاہیے تھی الّٰلہ تعالیٰ اس کے مال کو اور اس مال کی برکت کو بڑھاتے ہیں، اورسود لینے والا جس کے مال میں بظاہر اضافہ ہوتا نظر آتا تھا الّٰلہ تعالیٰ اس سود سے حاصل شدہ مال کو یا اس کی برکت کو مٹا دیتے ہیں۔

مٹانے سے کیا مطلب ہے؟ بعض مفسّرین نے فرمایا کہ یہ مٹانا اور بڑھانا آخرت کے متعلّق ہے کہ سود خور کا مال اس کے کچھ کام نہ آئے گااور اس کے لیے عذاب کا سبب بنے گا، جبکہ صدقہ و خیرات کرنے والوں کا مال آخرت میں ان کے لیے ابدی نعمتوں اور راحتوں کا ذریعہ بنے گا۔ بعض اور مفسّرین نے فرمایا کہ اس مٹانے اور بڑھانے کے کچھ اثرات دنیا میں بھی نظر آجاتے ہیں۔ مال حاصل کرنے کی ساری تگ و دو سے اصل مقصود کیا ہے؟ کیا محض اس بات سے خوش ہونا مقصود ہے کہ میرے بینک اکاؤنٹ میں رکھے پیسے کے نمبر بڑھتے جا رہے ہیں، یا اس کے ذریعے راحت، دل کا سکون اور اطمینان حاصل کرنا مقصودِ اصلی ہے؟ اگر ہر انسان خود انصاف سے غور کرے تو اسے پتہ چل جائے گا کہ راحتِ اصلی، دل کا سکون، دل کی خوشی اور اطمینان اسے حاصل ہے جس کے پاس مال بیشک کم ہو لیکن وہ اس میں سے صدقہ وخیرات کرتا ہو، یا اسے حاصل ہے جس حرام اور ناجائز طریقوں سے مال جمع کرتا ہو؟

آنحضرت ﷺ نے فرمایا: "سود اگرچہ کتنا ہی زیادہ ہو جائے مگر انجام کار نتیجہ اس کا قلّت ہے۔"

ماخوذ از معارف القرآن، از مفتی محمد شفیع رحمتہ الّٰلہ علیہ

سورہٴ البقرہ: ۲۷۵ - تیسرا حصّہ

تیسرے جملے میں مشرکین کے اس قول کا کہ بیع (یعنی سامانِ تجارت کا خریدنا بیچنا) بھی تو رِبا (سود) کی طرح ہے، الّٰلہ تعالیٰ نے یہ جواب دیا ہے کہ یہ لوگ بیع کو رِبا کے مثل اور برابر قرار دیتے ہیں حالانکہ الّٰل تعالیٰ نے بیع کو حلال کیا ہے اور رِبا کو حرام قرار دیا ہے۔ جیسا کہ پہلے آیا ہے ان لوگوں کا اعتراض تو عقلی طور پر تھا کہ جب دونوں کامقصد نفع کمانا ہے تو دونوں کا حکم بھی ایک ہونا چاہیے، لیکن الّٰلہ تعالیٰ نے ان کے اس سوال کا جواب عقلی طور پر نہیں حاکمانہ طور پر دیا ہے۔  

دین میں عقل کا کہاں تک عمل دخل ہے اس میں لوگ عام طور سے دو طرح کی غلطی کرتے ہیں۔ کچھ لوگ ایک انتہا پہ ہیں جو سمجھتے ہیں کہ دین کے معاملے میں عقل کا کوئ عمل دخل نہیں۔ کسی نے جو کہہ دیا یا باپ دادا سے جو کچھ سنا ہے وہی دین ہے، اس میں سوال کرنے کی کوئ گنجائش نہیں۔ وہ سوال کرنے کو گناہ اور دین کے کسی معاملے میں غور و فکر کرنے کو بے دینی سمجھتے ہیں۔ دوسری انتہا پہ وہ لوگ ہیں جو دین کے ہر ہر معاملے کو عقل کی کسوٹی پہ پرکھتے ہیں اور ہر حکم میں علّت تلاش کرتے ہیں۔ ان کا دین کی طرف رویّہ یہ ہوتا ہے کہ اگر یہ حکم میری عقل میں آیا تو میں اسے مانوں گا، ورنہ نہیں مانوں گا۔ ان کے نزدیک دین میں حجّت قرآن و حدیث نہیں ان کی اپنی عقل ہو جاتی ہے۔

بزرگوں کا کہنا ہے کہ ہر ایک کا ایمان الگ ہوتا ہے۔ مثلاً ایک چرواہا ہے جس نے ساری عمر کوئ کتاب نہیں پڑھی اور سوائے بکریاں چرانے کے کوئ علم حاصل نہیں کیا۔ اس کے لیے یہی بہتر ہے کہ وہ دین کی موٹی موٹی باتوں پہ ایمان لے آئے اور زیادہ کھوج کرید میں نہ پڑے ورنہ وہ پریشان ہو گا۔ اس کے بر عکس وہ آدمی ہے جو ذہین بھی ہے اور اس نے دنیا کا علم بھی بہت حاصل کیا ہے۔ اس کے لیے یہ اوپر والا طریقہ صحیح نہیں کیونکہ اسے اس طریقے سے اطمینان نہیں ہو گا اور وہ ہمیشہ پریشان رہے گا۔ ایسے آدمی کے لیے بہتر ہے کہ وہ دین کے بارے میں زیادہ سے زیادہ علم حاصل کرے، زیادہ سے زیادہ پڑھے، زیادہ سے زیادہ سوالات کا جواب حاصل کرنے کی کوشش کرے، اور جب دل و دماغ کو اطمینان ہو جائے تب الّٰلہ تعالیٰ پہ ایمان لائے۔

لیکن جب ایک دفعہ انسان کو اطمینان ہو جائے اور الّٰلہ پہ ایمان لے آئے، تو پھر الّٰلہ تعالیٰ کا ہر حکم ماننا پڑتا ہے چاہے اس کی وجہ سمجھ میں آئے یا نہ آئے۔ اس کی مثال ایسے ہے جیسے انسان کہیں ملازمت کرنے جاتا ہے۔ کوئ اسے مجبور نہیں کرتا کہ تم زبردستی اسی جگہ ملازمت کرو۔ انسان اس کے بارے میں معلومات حاصل کرتا ہے کہ یہاں تنخواہ مناسب ملے گی یا نہیں، یہاں کا کام میرے لیے مناسب ہے یا نہیں۔ لیکن یہ سب معلومات حاصل کرنے کے بعد جب ایک دفعہ وہ ملازمت اختیار کر لیتا ہے تو پھر وہ روز سوال نہیں کر سکتا کہ مجھے نو بجے روز کیوں آنا ہے، میں دس بجے کیوں نہیں آ سکتا، لنچ بریک ایک بجے کیوں ہوتی ہے، تین بجے کیوں نہیں ہوتی؟ اگر وہ شروع میں اس طرح کے سوال کرے گا تو اسے یہی کہا جائے گا کہ بھائ ضابطے سے کام کرنا ہے تو کرو نہیں تو یہ ملازمت چھوڑ دو۔ بعد میں پھر کام کرتے کرتے مختلف اصولوں کی وجوہات بھی سمجھ میں آنے لگتی ہیں۔

دین کا معاملہ بھی بالکل اسی طرح ہے۔ یہ تو انسان کے اختیار میں ہے کہ وہ الّٰلہ تعالیٰ پہ ایمان لائے یا نہ لائے۔ لیکن جو شخص ایمان لے آئے اور یہ کہہ دے کہ میں نے الّٰلہ تعالیٰ کو اس کائنات کا مالک اور قادرِ مطلق مانا، وہ الّٰلہ تعالیٰ سے یہ سوال کرنے کی جراٴت کیسے کر سکتا ہے کہ پہلے آپ مجھے اپنے ہر حکم کی وجہ بتائیں، پھر میں اس بات کا فیصلہ کروں گا کہ میں اس حکم کو مانوں گا کہ نہیں۔ مخلوق کی محدود عقل خالق کی حکمت کا احاطہ کیسے کر سکتی ہے؟